27 ліпеня 1990 года Вярхоўны Савет Беларусі прыняў Дэкларацыю аб дзяржаўным суверэнітэце Беларусі.

Дэкларацыя абвясціла "поўны дзяржаўны суверэнітэт Рэспублікі Беларусь, самастойнасць і паўнату дзяржаўнай улады рэспублікі ў межах яе тэрыторыі, правамоцнасць яе законаў, незалежнасць рэспублікі ў знешніх стасунках".

25 жніўня 1991 года Дэкларацыя аб дзяржаўным суверэнітэце атрымала статус канстытуцыйнага закону, на падставе якога былі ўнесеныя змены ў Канстытуцыю.

Да 1996 года 27 ліпеня было галоўным святам краіны – Днём незалежнасці Беларусі.
Улады скасавалі свята пасля рэферэндуму 1996 года.

1 ліпеня сусветна вядомыя дзеячы тэатра і кіно правялі ў Лондане акцыю пратэсту супраць уціску свабоды слова ў Беларусі.

Акцыя прайшла каля сцен беларускага пасольства на вуліцы Кэнсінгтон Корт, 6 у Лондане. Яе арганізавалі драматург і рэжысёр Том Стопард, акцёр і рэжысёр Самуэль Уэст, рэжысёр Клэр Лізімор.

Самуэль Уэст прачытаў урывак з п'есы Беларускага Вольнага тэатра «Пакаленне Jeans». Рэжысёр Клэр Лізімор падкрэсліў, што новы ўказ беларускіх улад аб Інтэрнэце “з'яўляецца відавочнай спробай абмежаваць свабоду слова і права на самавыяўленне”. “Усе мы павінны супрацьстаяць кожнай спробе забраць гэтыя свабоды", - адзначыў Самуэль Уэст.

Дзеячы культуры накіравалі адкрыты ліст Аляксандру Лукашэнка, у якім заклікаюць не абмяжоўваць дэмакратычныя свабоды і спыніць цэнзуру Інтэрнэту. Акрамя арганізатараў акцыі пад лістом падпісаліся Марк Равенхіл, Говард Брэнтан, Алан Рыкман, Лора Уэйд, Кэрыл Чэрчыль, Генры Гудман, Генры Портэр, Сымон Макберні, Сайман Стывенс і Ліндсі Тэрнер.

Раней знакамітасці напісалі адкрыты ліст да прэм'ер-міністра Вялікабрытаніі Дэвіда Камерона з патрабаваннем спыніць талерантнае стаўленне да апошняй дыктатуры ў Еўропе.

Днём 21 траўня паэт Уладзімір Някляеў, рэдактар газеты “Товарищ” Сяргей Вазняк і міжнародны сакратар Аб’яднанай грамадзянскай партыі Андрэй Дзмітрыеў выйшлі на свабоду.

18 траўня ў розных гарадах Беларусі супрацоўнікі міліцыі і спецслужб адначасова правялі  некалькі дзесяткаў ператрусаў у офісах грамадскіх аб’яднанняў, партый, незалежных прафсаюзаў і кватэрах актывістаў, якія падтрымалі грамадзянскую кампанію “Гавары праўду!”. Падчас ператрусаў канфіскаваліся кампутарная і аргтэхніка, дакументы, літаратура, грошы. Было затрымана і дапытана больш за 20 чалавек.

У ізалятар часовага ўтрымання на вул. Ахрэсціна ў Мінску на трое сутак былі змешчаныя лідэр кампаніі “Гавары праўду!” паэт Уладзімір Някляеў, рэдактар газеты «Товарищ» Сяргей Вазняк і міжнародны сакратар АГП Андрэй Дзмітрыеў.

Беларуская дэмакратычная супольнасць асудзіла дзеянні ўладаў, назваўшы іх "палітычна матываванымі", і выказала падтрымку грамадзянскай кампаніі "Гавары праўду!".

Занепакоенасць падзеямі ў Беларусі выказалі вядомыя еўрапейская палітыкі. 19 траўня з заявай выступіў Старшыня Еўрапарламента Ежы Бузэк. Ён заклікаў беларускія ўлады «неадкладна спыніць рэпрэсіі і пераслед структур грамадзянскай супольнасці і вярнуцца на шлях дэмакратызацыі».