Кніга "Асобы" вядомага беларускага журналіста Аляксандра Тамковіча выйшла за межамі Беларусі – у Санкт-Пецярбурзе. І гэта не дзіўна, паколькі гутарка ў ёй ідзе пра сучасную палітыку і найбольш яркіх палітычных ды грамадзкіх дзеячаў Беларусі. Кніга сьмелая, а дадзеныя ў ёй ацэнкі падзеяў і асобаў часам разыходзяцца не толькі з афіцыйнымі. Але якраз у гэтым яе каштоўнасьць, бо кніга найперш адлюстроўвае погляд чалавека, якому давялося не толькі жыць у няпросты час, але і як журналісту бываць у эпіцэнтры многіх падзеяў.

"Штодзённае жыццё жыхароў Беласточчыны ў пасляваенны перыяд (1944-1956)" – чацьвертая і апошняя з выдадзеных праграмнай радай тыднёвіка “Ніва” кніг тэтралогіі, а па сутнасці, беларускай энцыклапедыі Падляшскага краю. У яе аснове – дакументы, сведчанні, успаміны, расповед пра падзеі і факты, большай часткай невядомыя людзям у сучаснай Беларусі.

"Царскай трызна" – адна з апошніх кніг, выдадзеных праграмнай радай беластоцкага тыднёвіка "Ніва". Яе аўтар – журналістка "Нівы" Ганна Кандрацюк-Свярубская. Аповеды, сабраныя ў кнізе, чытаюцца лёгка, але пакідаюць у душы сум. Сум па тым, што адыходзіць, што прамінае, што, спяшаючыся паспець за поступам цывілізацыі, губляем назаўсёды.
Беларуская падляшская вёска з яе жыхарамі, якія лічаць сябе праваслаўнымі і ў сэрцах хаваюць язычніцтва... Сапраўднае адлюстраванне гэтай вёскі, яе жыхароў, іх вераванняў і забабонаў...