Кастрычнік

• 12.10.2008
.
Актывісты незарэгістраванага руху "Маладая Беларусь" пачалі збор подпісаў за ўсталяванне памятнага знаку на будынку, у якім 12 ліпеня 1918 года прадстаўнікі магілёўскай грамадскасці падтрымалі абвяшчэнне незалежнасці Беларускай Народнай Рэспублікі.

• 11.10.2008
.
Культурна-асветны клуб "Спадчына" звярнуўся да Савета Міністраў, Міністэрства абароны Рэспублікі Беларусь,Міністэрства культуры, Акадэміі навук Рэспублікі Беларусь, творчых саюзаў, палітычных партый і грамадскасці краіны са зваротам, у якім заклікаў адзначыць 600-годдзе перамогі пад Грунвальдам (15 ліпеня 2010 г.) на дзяржаўным узроўні.
.
Духоўна-асветная выстава "Пакроўскі кірмаш" адкрылася ў сталічным Палацы мастацтва. На ёй прадстаўленыя праваслаўная літаратура, аўдыёпрадукцыя, іконы, прадметы царкоўнага ўжытку і храмавага ўбрання, вырабы народных промыслаў ад манастыроў і праваслаўных прыходаў Беларусі, Расіі, Украіны. У межах "Пакроўскага кірмашу" пройдуць музычныя і літаратурныя мерапрыемствы.

• 10.10.2008
.
Дзяржаўная дума Расійскай Федэрацыі ратыфікавала расійска-беларускае пагадненне аб забеспячэнні роўных правоў грамадзян Расіі і Беларусі на свабоду перамяшчэння, выбар месца знаходжання і жыхарства на тэрыторыі краін Саюзнай дзяржавы.
.
Дэпутаты Палаты прадстаўнікоў у двух чытаннях прынялі дапаўненні ў закон "Аб дзяржаўных узнагародах Рэспублікі Беларусь", які прадугледжвае ўвядзенне ў Беларусі ганаровага звання "Заслужаны шахцёр Рэспублікі Беларусь".
.
У Мінскім міжнародным адукацыйным цэнтры пачаўся фэст нефармальнай адукацыі. У ім бяруць удзел каля 90 арганізацый і больш за 200 чалавек з Беларусі, Украіны, Расіі, Нямеччыны, Швецыі, Даніі ды Польшчы.
.
У Гародні на вуліцы Замкавай адкрыўся музей пажарнай службы. Яго экспазіцыя размесцілася ў дзвюх залах, а таксама ў старой пажарнай каланчы, пабудаванай у царскія часы.

• 09.10.2008
.
Пачаліся IV Кракаўскія дні літаратуры ў Польшчы. У іх бяруць удзел 11 беларускіх пісьменнікаў, перакладчыкаў і перформераў: Зміцер Вішнёў, Вольга Гапеева, Югася Каляда, Інеса Кур`ян, Яўген Лёсік, Марыйка Мартысевіч, Ярыла Пшанічны, Ілля Сін, Сяргей Сматрычэнка, Андрэй і Алена Хадаровіч.
.
Міжнародная навуковая канферэнцыя "Сусветны літаратурны працэс: аўтар-жанр-стыль" адкрылася ў Брэсце. У ёй прымаюць удзел вучоныя з Беларусі, Расіі, Украіны, Польшчы і Азербайджана. Першы дзень канферэнцыі прысвечаны інавацыйным падыходам у даследаваннях і выкладанні сусветнай літаратуры ў ВНУ і школах.
.
Пасля рэканструкцыі ў Гародні адкрыты Стары мост цераз Нёман, які быў пабудаваны ў 1949 годзе і злучае два раёны ў цэнтральный частцы горада.

• 08.10.2008
.
Старшыня грамадскага аб'яднання "Беларускае добраахвотнае таварыства аховы помнікаў гісторыі і культуры" Антон Астаповіч звярнуўся з адкрытым лістом да генеральнага пракурора Беларусі Рыгора Васілевіча, у якім заявіў пра шматлікія выпадкі парушэння закона "Аб ахове гісторыка-культурнай спадчыны Рэспублікі Беларусь" пры правядзенні работ у гістарычным цэнтры Мінска.

• 07.10.2008
.
У мемарыяльным комплексе "Брэсцкая крэпасць-герой" адкрылася выстава "З найвялікшай жорсткасцю… Злачынствы вермахта ў Польшчы, верасень-кастрычнік 1939 года". На ёй Прадстаўлена 120 гістарычных фотаздымкаў і дакументаў аб злачынствах гітлераўцаў на тэрыторыі Польшчы ў гэты перыяд Другой сусветнай вайны. Экспазіцыя створаная польскімі і нямецкімі гісторыкамі.
.
У Вялікай зале Беларускай дзяржаўнай філармоніі адкрыўся III Міжнародны фестываль Юрыя Башмета, які ставіць за мэту - забяспечыць магчымасць сумеснага музіцыравання маладых перспектыўных выканаўцаў і прызнаных майстроў.

• 06.10.2008
.
Да 685-годдзя Ліды ў горадзе адкрытыя чатыры помнікі: мемарыяльны камень з выбітым старажытным гербам горада, помнік чыгуначнікам, бронзавая кампазіцыя савецкаму камандзіровачнаму і гранітны сонечны гадзіннік.

• 05.10.2008
.
На IV Міжнародным фестывалі-конкурсе "Песні свету" ў Кішынёве беларускі выканаўца Іван Буслай удастоены трэцяй прэміі.

• 04.10.2008
.
685 гадоў з часу заснавання горада адзначылі ў Лідзе. У гэты дзень адкрыўся Лідскі гісторыка-мастацкі музей, дзе была презентаваная выстава, прысвечаная вялікаму князю Гедыміну, які ў 1323 годзе пачаў будаваць Лідскі замак, а на гарадской плошчы адбылося тэатралізаванае прадстаўленне.
.
У гарадзенскай капліцы рыма-каталіцкай парафіі Аўгустовак прайшла прэзентацыя віртуальнай энцыклапедыі "Нашы Касцёлы" і збору твораў ксяндза Адама Станкевіча "З Богам да Беларусі". На ёй выступілі аўтары дыску і ўкладальнікі 1100-старонкавай кнігі прац Адама Станкевіча.
.
У Нясвіжы адкрылася пасяджэнне групы беларускіх і польскіх экспертаў па пытаннях нясвіжскіх помнікаў. У ім бяруць удзел прадстаўнікі міністэрстваў культуры Беларусі і Польшчы.

• 03.10.2008
.
У Мінскім Палацы мастацтва адкрылася выстава XVI міжнароднага агляду-конкурсу міжнароднай асацыяцыі саюзаў архітэктараў (МАСА) на найлепшы праект 2008 года. У межах творчай акцыі дэманструюцца матэрыялы III рэспубліканскага конкурсу дыпломных праектаў вышэйшых і сярэдніх спецыяльных архітэктурных школ Беларусі за 2008 год, работы членаў Міжнароднай акадэміі архітэктуры, а таксама праекты-фантазіі вядомага рускага архітэктара і тэарэтыка мастацтва Якава Чэрніхава (1889—1951), адкрытая выстава, прысвечаная памяці мастака і галоўнага архітэктара Інстытута горадабудаўніцтва Беларусі Віктара Сахно.
.
Аўтары падземнага грамадска-гандлёвага цэнтра "Сталіца" на плошчы Незалежнасці ў Мінску ўзнагароджаны залатым медалём і гран-пры XVI міжнароднага агляду-конкурсу Міжнароднай асацыяцыі саюза архітэктараў ў намінацыі "За лепшую пабудову года" на тэрыторыі краін СНД.
.
Палата прадстаўнікоў Нацыянальнага сходу Беларусі прыняла ў першым чытанні змяненні ў закон "Аб культуры", які прыведзены ў адпаведнасць з Указам прэзідэнта № 259 "Аб арганізацыі гастрольна-канцэртнай дзейнасці".
.
V Беларускі міжнародны фестываль тэатраў лялек адкрыўся ў Мінску. На ім будзе прадстаўлена больш як 20 спектакляў тэатраў з Беларусі, Бельгіі, Вялікабрытаніі, Германіі, Літвы, Польшчы, Расіі, Славеніі, Украіны і Чэхіі.
.
Дэпутаты Палаты прадстаўнікоў на пленарным пасяджэнні прынялі ў першым чытанні законапраект "Аб ахове атмасфернага паветра", які вызначае прававыя і арганізацыйныя асновы аховы атмасфернага паветра ад забруднення выкідамі хімічных і біялагічных рэчываў у выніку гаспадарчай ды іншай дзейнасці юрыдычных асобаў і індывідуальных прадпрымальнікаў.

• 02.10.2008
.
Прадстаўнікі магнацкага роду Радзівілаў перадалі Беларусі матэрыялы па гісторыі сваіх продкаў: два арыгінальныя прыжыццёвыя гравюрныя партрэты XV і XVI стагоддзяў Януша і Мікалая Радзівілаў, лічбавую копію партрэта Барбары Радзівіл і актуалізаванае генеалагічнае дрэва роду Радзівілаў.
.
У Мінску прэзентаваны архіўны даведнік "Беларускае таварыства па аказанні дапамогі пацярпелым ад вайны. 1916—1918 гады", створаны супрацоўнікамі Нацыянальнага архіва Беларусі і Цэнтральнага дзяржаўнага гістарычнага архіва Санкт-Пецярбурга. У выданні прадстаўлены матэрыялы і дакументы з архіва Беларускага таварыства ў Петраградзе.
.
Званне доктара honoris causa Кіеўскай духоўнай акадэміі прысвоена мітрапаліту Мінскаму і Слуцкаму Філарэту, патрыяршаму экзарху ўсяе Беларусі. Цырымонія ўручэння дыплома адбылася 28 верасня ў Кіеве ў межах VIII міжнародных Успенскіх чытанняў "Памяць і гісторыя: на скрыжаванні культур".
.
Санаторый-прафілакторый пісьменнікаў "Іслач" каля вёскі Ракаў Валожынскага раёна Мінскай вобласці прададзены ААТ "Белінвесткапітал" (Мінск) за 3,5 млрд. рублёў на адкрытым аўкцыёне, які адбыўся 2 кастрычніка ў Дзяржаўным камітэце па маёмасці.

• 01.10.2008
.
Упраўленне рэгістрацыі і класіфікацыі кінавідэапрадукцыі дэпартамента па кінематаграфіі Міністэрства культуры Беларусі адмовіла ў рэгістрацыі тэлеспектаклю "Тутэйшыя", знятага па заказе тэлеканала "Белсат" (Польшча).
.
Пачалася агульнабеларуская кампанія "Будзьма!", ініцыятарамі якой выступілі беларускія творчыя і грамадскія аб`яднанні дэмакратычнай скіраванасці. Сярод бліжэйшых акцый кампаніі - выпуск трох зборнікаў сучаснай беларускай музыкі "Будзьма The Best", канцэрты, лекцыі, выставы, сустрэчы і прэзентацыі.
.
На пасяджэнні прадстаўнікоў грамадскасці ў Мінску зацверджаны план мерапрыемстваў, прысвечаных Дню памяці ахвяраў сталінскіх рэпрэсій у Беларусі: 28 кастрычніка ў сталічным офісе Партыі БНФ адбудзецца абвяшчэнне прыгавору грамадскага трыбунала "Злачынствы сталінізму ў Беларусі", прэзентацыя інтэрнет-партала Леаніда Маракова, яго кнігі нарысаў "Непрымірымыя", будзе паказаны фільм "Курапаты: дарога сумлення", 29 кастрычніка ў Курапатах адбудзецца адкрыццё мемарыяльнага знака на адным з пахаванняў.